خضدار – بلوچستان کے ضلع خضدار میں زیرو پوائنٹ نیشنل ہائی وے کے قریب ایک اسکول بس پر ہونے والے خوفناک بم دھماکے میں تین معصوم بچے اور دو اساتذہ جاں بحق ہوگئے جبکہ 38 سے زائد افراد زخمی ہوئے، جن میں اکثریت بچوں کی ہے۔
انٹر سروسز پبلک ریلیشنز (آئی ایس پی آر) کے مطابق دھماکے میں اسکول بس مکمل طور پر تباہ ہو گئی۔ زخمیوں کو فوری طور پر سی ایم ایچ خضدار منتقل کر دیا گیا جہاں ان کا علاج جاری ہے۔
اس افسوسناک واقعے کی مذمت کرتے ہوئے امریکہ کی ناظم الامور نیتھلی اے. بیکر نے اسے "بے رحمانہ اور ناقابل تصور” قرار دیا۔
"معصوم بچوں کا قتل ایک بے حد سفاک عمل ہے۔ ایسے واقعات ناقابل فہم ہیں۔ ہم متاثرہ خاندانوں کے غم میں برابر کے شریک ہیں اور زخمیوں کی جلد صحتیابی کے لیے دعا گو ہیں۔ کوئی بچہ اسکول جانے سے خوفزدہ نہ ہو، یہ ہر بچے کا حق ہے،” نیتھلی بیکر نے اپنے بیان میں کہا۔
انہوں نے پاکستان میں دہشت گردی کے خاتمے کے لیے کام کرنے والے افراد کے ساتھ امریکی حمایت کے عزم کا اعادہ بھی کیا۔
واقعے کے بعد علاقے کو سیکیورٹی فورسز نے گھیرے میں لے کر تحقیقات کا آغاز کر دیا ہے، جبکہ ملک بھر میں بچوں اور تعلیمی اداروں کی سیکیورٹی پر ایک بار پھر سوالات اٹھنے لگے ہیں۔
