وفاقی اردو یونیورسٹی میں "میڈیا کا انسانی حقوق اور سماجی انصاف میں کردار” کے موضوع پر سیمینار، ظفر عباس مہمانِ خصوصی
کراچی — وفاقی اردو یونیورسٹی عبدالحق کیمپس میں شعبہ ابلاغِ عامہ کے تحت "میڈیا کی انسانی حقوق اور سماجی انصاف کے لیے کوششیں” کے عنوان سے ایک اہم سیمینار کا انعقاد کیا گیا۔
معروف سماجی کارکن اور جے ڈی سی فاؤنڈیشن کے بانی ظفر عباس نے مہمانِ خصوصی کی حیثیت سے شرکت کی۔ سیمینار میں فیکلٹی ممبران اور طلبہ و طالبات کی بڑی تعداد نے شرکت کی۔
ظفر عباس نے سوشل میڈیا کی طاقت پر روشنی ڈالتے ہوئے کہا، "کراچی میں صحت، پانی، مہنگائی اور ڈمپر مافیا جیسے مسائل کے خلاف آواز بلند کی ہے، اور اس جدوجہد کا کریڈٹ سوشل میڈیا کو جاتا ہے۔”
صحت کے حوالے سے گفتگو کرتے ہوئے ان کا کہنا تھا، "پاکستان میں ہر تین خواتین میں سے ایک کو بریسٹ کینسر ہوتا ہے، لیکن مقامی ڈاکٹر اس کا ذکر نہیں کرتے تاکہ ان کی کمائی متاثر نہ ہو۔ میں نے جرمنی سے سات لاکھ ڈالر مالیت کی جدید مشین منگوائی ہے، جس سے اب یہ ٹیسٹ صرف 3 ہزار روپے میں دستیاب ہے۔”
سیمینار کے اختتام پر شعبہ ابلاغِ عامہ کے سربراہ نے ظفر عباس کو اعزازی شیلڈ پیش کی، جس کے بعد طلبہ و طالبات کے ساتھ فوٹو سیشن بھی منعقد ہوا۔
