اعلیٰ ثانوی تعلیمی بورڈ کراچی کے تحت جاری انٹرمیڈیٹ کے سالانہ امتحانات 2025ء کے دوران شام کی شفٹ میں سائنس جنرل گروپ کا کمپیوٹر سائنس پرچہ اول لیا گیا، جس میں نقل کی کوشش ناکام بناتے ہوئے 44 موبائل فونز ضبط کیے گئے۔
انٹربورڈ کے کنٹرول روم کمیٹی کو موصول ہونے والی شکایت پر پروفیسر منور عباس، پروفیسر سید عمران علی اور پروفیسر مقبول میمن پر مشتمل خصوصی ٹیم نے انٹربورڈ افسران کے ساتھ ایس ایم گورنمنٹ آرٹس اینڈ کامرس کالج (ایوننگ) پر اچانک چھاپہ مارا۔
چھاپے کے دوران امتحانی مرکز سے نقل میں استعمال ہونے والے 44 موبائل فونز برآمد ہوئے، جو امیدواروں کے ایڈمٹ کارڈز کے ساتھ سینٹر سپرنٹنڈنٹ کے حوالے کر دیے گئے تاکہ مزید قانونی کارروائی کی جا سکے۔ بورڈ حکام کا کہنا ہے کہ امتحانی عمل کی شفافیت یقینی بنانے کیلئے سخت اقدامات جاری رہیں گے۔
