کراچی، 25 جنوری 2026:
شاہ عبدالطیف یونیورسٹی خیرپور سے 147 جعلی ڈگریوں کے اجرا کی خبریں سامنے آنے پر وزیر جامعات و تعلیمی بورڈز سندھ محمد اسماعیل راہو نے سخت نوٹس لے لیا ہے اور وائس چانسلر سے تفصیلی رپورٹ طلب کر لی ہے۔
صوبائی وزیر نے سیکریٹری جامعات کو ہدایت دی ہے کہ جعلی ڈگریوں کے معاملے پر شفاف تحقیقات کی جائیں اور اعلیٰ سطحی تحقیقاتی کمیٹی قائم کی جائے۔ محمد اسماعیل راہو کا کہنا ہے کہ جعلی ڈگریاں بنانے اور فروخت کرنے والی مافیا کے خلاف سخت قانونی کارروائی کی جائے گی اور اس معاملے میں ملوث افراد کو کسی صورت معاف نہیں کیا جائے گا۔
وزیر جامعات سندھ نے واضح کیا کہ تعلیمی نظام کی ساکھ پر کوئی سمجھوتہ نہیں کیا جائے گا اور قانون کے مطابق سخت اقدامات کیے جائیں گے۔
دوسری جانب شاہ عبدالطیف یونیورسٹی خیرپور کے رجسٹرار نے جعلی ڈگریوں کے معاملے میں ملوث افراد کے خلاف ایف آئی آر درج کروا دی ہے، جبکہ ملزمان کے خلاف مزید قانونی کارروائی بھی جاری ہے۔
