فیڈرل ٹی بی سینٹر کی جگہ چلڈرن اسپتال اور نرسنگ سینٹر کی تعمیر کے لیے پنجاب نے وفاق سے قبضہ مانگ لیا ہے۔
ذرائع کا کہنا ہے کہ فیڈرل ٹی بی سینٹر راولپنڈی کی پنجاب حکومت کو حوالگی کا فیصلہ کیا گیا ہے، اور وفاق نے پنجاب حکومت سے رابطہ کر کے ٹرانزیشن پلان مانگ لیا ہے۔
ٹرانزیشن پلان کی فراہمی پر ٹی بی سینٹر کی ملکیت پنجاب حکومت کو منتقل ہوگی، صوبائی حکومت کو لکھے گئے خط میں کہا گیا ہے کہ وہ سینٹر کے اثاثوں، ملازمین اور ان کے مستقل، اور آلات کے استعمال کا پلان فراہم کر دے۔مراسلے کے مطابق وزارت صحت ٹی بی سینٹر سے متعلق کابینہ کے فیصلے پر عمل درآمد یقینی بنائے گی۔
یاد رہے کہ پنجاب حکومت نے وفاق سے ٹی بی سینٹر راولپنڈی کا قبضہ دینے کی درخواست کی ہے کہ اس کی اراضی صوبہ کو منتقل کی جائے، ذرائع کا کہنا ہے کہ پنجاب حکومت قبضہ ملنے پر فوری طور پر تعمیرات شروع کر دے گی۔
فیڈرل ٹی بی سینٹر راولپنڈی کی 129 کنال اراضی وفاقی حکومت کے نام ہے، اس سینٹر کی جگہ چلڈرن اسپتال اور ایشیائی ترقیاتی بینک کی معانت سے ایک نرسنگ ایکسیلنس سینٹر تعمیر ہوگا، جہاں نرسوں کو تعلیم و تربیت فراہم کی جائے گی۔
