ماہرہ خان نے خلیل الرحمان قمر سے ماضی کے اختلاف پر افسوس کا اظہار
معروف اداکارہ ماہرہ خان نے بالآخر مصنف خلیل الرحمان قمر سے ماضی میں ہونے والے تنازع پر بات کرتے ہوئے تسلیم کیا ہے کہ وہ معاملے کو بہتر انداز میں سنبھال سکتی تھیں۔
ایک حالیہ پوڈکاسٹ میں ماہرہ نے کہا، "اگر مجھے کوئی شکایت تھی، تو مجھے انہیں فون کرنا چاہیے تھا۔ وہ درست تھے۔”
انہوں نے وضاحت کی کہ ایک رات گئے شوٹنگ کے دوران ایک مضمون پڑھنے کے بعد انہوں نے غصے میں آکر ٹویٹ کر دی، لیکن بعد میں احساس ہوا کہ ایسے معاملات نجی طور پر حل ہونے چاہئیں۔
ماہرہ نے یہ بھی بتایا کہ ان کی والدہ نے انہیں سمجھایا کہ سینئرز سے براہ راست بات کرنا بہتر ہوتا ہے۔
"نیت بے ادبی کی نہیں تھی، مگر اب سمجھ آتا ہے کہ ایسا تاثر ہو سکتا تھا،” انہوں نے کہا۔
اداکارہ نے اس بات پر بھی روشنی ڈالی کہ انڈسٹری میں لوگ طاقتور شخصیات کے خلاف بولنے سے ڈرتے ہیں، کیونکہ اس کے پیشہ ورانہ نتائج ہو سکتے ہیں۔
انہوں نے واضح کیا کہ اب ذاتی حملوں سے انہیں فرق نہیں پڑتا۔
"ایک وقت تھا جب ایسی باتیں مجھے متاثر کرتی تھیں، مگر اب نہیں،” ماہرہ نے کہا۔
ان کا یہ بیان مداحوں کی جانب سے مثبت انداز میں سراہا جا رہا ہے، اور اسے ایک بلند ظرفی اور ذہنی پختگی کی علامت قرار دیا جا رہا ہے۔
