پاکستانی فلم انڈسٹری کے سینئر اداکار ارباز خان نے معروف اداکار شان شاہد کو ملکی سنیما کے زوال کا باعث قرار دیا ہے۔
ایک حالیہ پوڈکاسٹ میں گفتگو کرتے ہوئے ارباز خان نے پاکستانی سنیما کی بگڑتی ہوئی حالت پر تشویش کا اظہار کیا۔ ان کا کہنا تھا کہ شان شاہد ایک دور میں فلم انڈسٹری کے سپر اسٹار تھے اور ان کی موجودگی کو فلم کی کامیابی کی ضمانت سمجھا جاتا تھا، لیکن افسوس کہ انہوں نے بطور اسٹار اپنی پیشہ ورانہ ذمہ داریاں پوری نہیں کیں۔
ارباز خان نے شان کو "غیر پیشہ ور” قرار دیتے ہوئے الزام عائد کیا کہ اگرچہ فلم کا شوٹنگ شیڈول صبح 10 بجے سے شام 6 بجے تک ہوتا تھا، لیکن شان اکثر سہ پہر 3 بجے سیٹ پر آتے اور روزانہ صرف دو سے تین گھنٹے کام کرتے۔ ان کے اس رویے نے فلموں کی پروڈکشن میں رکاوٹیں ڈالیں اور معیار پر منفی اثر ڈالا۔
انہوں نے مزید کہا کہ شان کی تاریخوں کا مسئلہ ہمیشہ پروڈیوسرز کے لیے ایک مستقل پریشانی رہا۔ ارباز کے مطابق، شان کا غیر سنجیدہ اور غیر ذمہ دارانہ رویہ پاکستانی فلم انڈسٹری کے زوال میں ایک بڑی رکاوٹ ثابت ہوا۔
یاد رہے کہ شان شاہد ماضی میں پاکستانی سنیما کے مقبول ترین اداکاروں میں شمار ہوتے تھے اور ایک طویل عرصے تک ہر بڑی فلم کا اہم حصہ رہے ہیں۔ تاہم، ارباز خان کے مطابق، ان کا غیر ذمہ دارانہ رویہ آج انڈسٹری کو درپیش مسائل کی ایک اہم وجہ بنا۔
