علیگڑھ انسٹیٹیوٹ آف ٹیکنالوجی کے شعبہ سول اور آرکیٹیکچر کے طلبہ نے کراچی واٹر اینڈ سیوریج کارپوریشن کے واٹر پیوریفیکیشن پلانٹ کا صنعتی دورہ کیا، جس کا مقصد کلاس روم سے باہر عملی تعلیم حاصل کرنا تھا۔
یہ دورہ ہر سال کی طرح سربراہ شعبہ سول و آرکیٹیکچر انجینیئر مدیحہ یونس کی زیر نگرانی منعقد ہوا۔ دورے کا مقصد طلبہ کو پانی صاف کرنے کے جدید طریقہ کار، تکنیکی عمل اور انفرااسٹرکچر سے آگاہی فراہم کرنا تھا۔ طلبہ نے پلانٹ کے مختلف حصوں کا مشاہدہ کیا، جن میں پانی کے فلٹریشن، کلورینیشن، اور ذخیرہ کرنے کے مراحل شامل تھے۔
طلبہ کو نہ صرف پانی صاف کرنے کے سائنسی اور انجینئرنگ اصولوں پر لیکچر دیا گیا بلکہ عملی مظاہرے کے ذریعے یہ دکھایا گیا کہ کس طرح کراچی جیسے بڑے شہر میں لاکھوں افراد کو صاف پانی فراہم کیا جاتا ہے۔ اس تعلیمی سرگرمی سے طلبہ میں نہ صرف تکنیکی فہم میں اضافہ ہوا بلکہ ان کی پیشہ ورانہ صلاحیتوں کو بھی نکھارنے کا موقع ملا۔
اس موقع پر پرنسپل AIT شاہد جمیل نے کہا کہ "ایسے انڈسٹریل وزٹس ہمارے طلبہ کے لیے حقیقی دنیا کے چیلنجز سے نبرد آزما ہونے کی تیاری کا بہترین ذریعہ ہیں۔”
کنوینر AIT سید محمد محسن کاظم نے اپنے خیالات کا اظہار کرتے ہوئے کہا کہ ” AIT ایسے اقدامات کے ذریعے طلبہ کو عملی تجربہ فراہم کر کے انہیں بااعتماد اور باصلاحیت انجینئر بنانے کے مشن پر گامزن ہے۔
یہ دورہ نہ صرف ایک علمی تجربہ تھا بلکہ طلبہ کے لیے عملی دنیا سے جڑنے کا ایک مؤثر ذریعہ بھی ثابت ہوا۔
میڈیا کوآرڈینیٹر AIT
