بالی ووڈ کے معروف سپر اسٹار سلمان خان نے انکشاف کیا ہے کہ وہ بیک وقت کئی خطرناک اور جان لیوا بیماریوں میں مبتلا ہیں، جس نے ان کے مداحوں کو شدید تشویش میں مبتلا کر دیا ہے۔
حالیہ دنوں "دی گریٹ انڈین کپل شو” میں شرکت کے دوران 58 سالہ اداکار نے اپنی صحت سے متعلق مسائل پر کھل کر بات کی۔ شو کے میزبان کپل شرما نے جب ان سے شادی نہ کرنے کی وجہ پوچھی تو سلمان خان نے حیران کن انکشاف کرتے ہوئے کہا کہ وہ متعدد دائمی اور سنگین طبی مسائل کے باوجود مسلسل کام کر رہے ہیں۔
سلمان خان کا کہنا تھا:
"ہم روز ہڈیاں تڑوا رہے ہیں، پسلیاں ٹوٹ چکی ہیں۔ میں ٹریجمنل نیورالجیا، برین انیورزم، اور اے وی مالفارمیشن جیسی بیماریوں کے ساتھ بھی کام کر رہا ہوں، پھر بھی چل رہا ہوں۔”
ان کا یہ انکشاف نہ صرف مداحوں کو چونکا گیا بلکہ طبی ماہرین کی توجہ بھی حاصل کر گیا۔
ٹریجمنل نیورالجیا ایک دائمی اعصابی مرض ہے جسے ’’سوسائیڈ ڈیزیز‘‘ بھی کہا جاتا ہے، کیونکہ اس میں مریض کو چہرے میں ناقابلِ برداشت جھٹکوں جیسے درد کا سامنا ہوتا ہے، جو اسے ذہنی اذیت میں مبتلا کر سکتا ہے۔
برین انیورزم ایک خاموش لیکن مہلک کیفیت ہے جس میں دماغ کی کسی خون کی نالی میں کمزوری کے باعث ایک ابھار پیدا ہوتا ہے، جو کسی بھی وقت پھٹ سکتا ہے اور ’’ہیمرجک اسٹروک‘‘ کا سبب بن سکتا ہے۔
اے وی مالفارمیشن (Arteriovenous Malformation) ایک نایاب بیماری ہے جس میں دماغ یا ریڑھ کی ہڈی کی خون کی شریانیں غیر معمولی طور پر جُڑ جاتی ہیں، جس سے خون کے بہاؤ میں رکاوٹ پیدا ہوتی ہے۔ اس کے اثرات میں شدید سر درد، جھنجھناہٹ، بیہوشی یا دورے شامل ہو سکتے ہیں۔
سلمان خان کے مداح جہاں ان کے حوصلے اور پیشہ ورانہ کمٹمنٹ کی داد دے رہے ہیں، وہیں ان کی صحت کو لے کر فکرمند بھی ہیں۔ اداکار کا یہ اعتراف نہ صرف ذاتی ہمت کی مثال ہے بلکہ عوامی سطح پر صحت سے متعلق شعور اجاگر کرنے کا باعث بھی بن رہا ہے۔
