کراچی: شہر قائد کے 9 ٹاؤنز کے چیئرمینز نے لائن لاسز کی بنیاد پر کی جانے والی لوڈشیڈنگ کے خلاف سندھ ہائیکورٹ سے رجوع کر لیا ہے۔
درخواست گزار چیئرمینز کا تعلق جماعت اسلامی سے ہے، جنہوں نے عدالت میں مؤقف اختیار کیا ہے کہ آئین کے تحت بجلی کی فراہمی عوام کا بنیادی حق ہے، اور اس حوالے سے سپریم کورٹ سمیت اعلیٰ عدالتوں کے فیصلے بھی موجود ہیں۔
درخواست میں مؤقف اختیار کیا گیا کہ مخصوص علاقوں میں لائن لاسز یا بجلی چوری کی بنیاد پر پورے علاقوں کو سزا دینا غیر آئینی اور ناانصافی پر مبنی اقدام ہے۔
چیئرمینز نے عدالت سے استدعا کی ہے کہ نیپرا کو ہدایت دی جائے کہ وہ کے الیکٹرک کے خلاف کارروائی کرے اور شہریوں کو بغیر کسی امتیاز کے بجلی کی فراہمی یقینی بنائی جائے۔
