پاکستان کی ابھرتی ہوئی اداکارہ ریحام رفیق نے ڈرامہ انڈسٹری میں خواتین کو درپیش مشکلات اور غیر محفوظ ماحول کی حقیقت سامنے لا دی ہے۔ ایک حالیہ انٹرویو میں انہوں نے نئی اداکاراؤں کو خبردار کیا کہ اس شعبے میں قدم رکھنے سے پہلے مکمل طور پر چیلنجز سے آگاہ ہو جائیں۔
ریحام نے کہا کہ اداکاراؤں کے درمیان مقابلہ فطری بات ہے، لیکن بعض اوقات یہ حسد اور منفی رویوں کی شکل اختیار کر لیتا ہے۔ انہوں نے کہا کہ یہ مسئلہ صرف شوبز تک محدود نہیں بلکہ ہر پیشہ ورانہ میدان میں خواتین کو مختلف مشکلات کا سامنا ہوتا ہے۔
ریحام نے کہا، "میری ذاتی طور پر کبھی کوئی ناخوشگوار صورتحال پیش نہیں آئی، مگر مجموعی طور پر میں ڈرامہ انڈسٹری کو خواتین کے لیے غیر محفوظ سمجھتی ہوں۔” انہوں نے خواتین کو ذہنی طور پر تیار رہنے اور اپنی حفاظت کے طریقے سیکھنے کی تاکید کی۔
اداکارہ نے کہا کہ انڈسٹری میں مختلف قسم کے لوگ ہوتے ہیں اور یہ فرد کی مرضی ہے کہ وہ کون سا راستہ چنتا ہے۔ انہوں نے نئی آنے والی اداکاراؤں کو چوکنا رہنے اور مضبوطی سے کام کرنے کا مشورہ دیا۔
