وزیرِ اعظم کی لیپ ٹاپ اسکیم فیز 4 کی مرکزی افتتاحی تقریب 25 جولائی کو جناح کنونشن سینٹر، اسلام آباد میں منعقد کی جائے گی۔ اس بات کا اعلان وفاقی وزیر برائے تعلیم و پیشہ ورانہ تربیت ڈاکٹر خالد مقبول صدیقی نے ایک اعلیٰ سطحی اجلاس میں کیا۔
یہ اجلاس لیپ ٹاپ اسکیم کی تیسری خصوصی کمیٹی کا تھا جس کی صدارت ڈاکٹر خالد مقبول صدیقی نے کی جبکہ اس کی مشترکہ صدارت وزیراعظم یوتھ پروگرام کے چیئرمین رانا مشہود نے کی۔ اجلاس میں وفاقی وزیر برائے عوامی امور رانا مبشر اقبال اور وزیر اطلاعات و نشریات عطا اللہ تارڑ نے بھی شرکت کی۔
اجلاس میں علاقائی کوٹہ، درخواستوں کی تقسیم اور اسکیم کے عملی پہلوؤں پر تفصیلی غور کیا گیا۔ اس موقع پر یہ فیصلہ بھی کیا گیا کہ وزارت اطلاعات و نشریات کے تعاون سے ایک بھرپور میڈیا آگاہی مہم چلائی جائے گی، جس کی قیادت وزارتِ اطلاعات کرے گی۔
ڈاکٹر خالد مقبول صدیقی نے کہا کہ لیپ ٹاپ اسکیم وزیرِ اعظم شہباز شریف کے وژن کا حصہ ہے جس کا مقصد نوجوانوں کو ڈیجیٹل سہولیات تک رسائی دینا اور انہیں قومی ترقی میں متحرک کردار کے لیے تیار کرنا ہے۔
رانا مشہود نے کہا کہ نوجوانوں کو بااختیار بنانا پاکستان کے مضبوط اور روشن مستقبل کی بنیاد ہے، اور یہی وژن لیپ ٹاپ اسکیم کے ذریعے عملی شکل اختیار کر رہا ہے۔ انہوں نے مزید بتایا کہ دیگر شہروں میں بھی علاقائی تقریبات منعقد کی جائیں گی جن کی تاریخوں کا اعلان جلد کیا جائے گا۔
