ماہرین کا کہنا ہے کہ گرین ہاؤس گیسوں کی وجہ سے زمین گرم ہو رہی ہے
چھٹیوں کے اختتام ہفتہ کے دوران ٹیکساس کے وسطی علاقوں میں طوفانی بارشوں کے باعث تباہ کن سیلاب آئے، جن میں 100 سے زائد افراد، جن میں کئی بچے بھی شامل تھے، جان کی بازی ہار گئے۔ ماہرین موسمیات کا کہنا ہے کہ ایسے شدید موسمی حالات اب پہلے سے کہیں زیادہ عام اور شدید ہو رہے ہیں اور اس کی بنیادی وجہ موسمیاتی تبدیلی ہے۔
اگرچہ کسی مخصوص موسم کو براہِ راست موسمیاتی تبدیلی کا نتیجہ نہیں کہا جا سکتا، لیکن ماہرین اس بات پر متفق ہیں کہ زمین کا بڑھتا ہوا درجہ حرارت طوفانی بارشوں اور سیلابوں کی شدت میں اضافہ کر رہا ہے۔ نیشنل ویدر سروس (NWS) کی جانب سے شدید بارش کی پیشگوئی کی گئی تھی، لیکن رات کے وقت اچانک برسنے والی بارش اور دریاؤں کی سطح میں تیزی سے اضافہ ہونے کی وجہ سے لوگوں کو بروقت محفوظ مقام پر منتقل ہونے کا موقع نہیں مل سکا۔
کیلیفورنیا یونیورسٹی کے ماہرِ موسمیات ڈینیئل سوین کے مطابق گرم ہوتی ہوئی زمین کی وجہ سے شدید بارشیں عام ہوتی جا رہی ہیں، کیونکہ گرم ہوا میں زیادہ نمی جذب کرنے کی صلاحیت ہوتی ہے، جو طوفانوں کے دوران بھاری بارشوں کا باعث بنتی ہے۔
ٹیکساس اے اینڈ ایم یونیورسٹی کے پروفیسر اینڈریو ڈیسلر نے کہا کہ خلیج میکسیکو کے گرم پانیوں سے اٹھنے والی نمی طوفانوں کو طاقتور بناتی ہے، جس سے ٹیکساس میں فلیش فلڈ (اچانک سیلاب) کا خطرہ بڑھ رہا ہے۔ انہوں نے یہ بھی وضاحت کی کہ ٹیکساس ہِل کنٹری جیسے پہاڑی علاقوں میں بارش کا پانی جلدی ندی نالوں میں بہہ جاتا ہے، جس سے دریاؤں کی سطح تیزی سے بڑھ جاتی ہے۔
ییل یونیورسٹی کی ماہر جینیفر مارلن نے کہا کہ فوسل فیولز (کوئلہ، گیس، تیل) کے جلنے سے پیدا ہونے والی گرمی فضا کو گرم کر رہی ہے، اور یہ گرم فضا زیادہ نمی جذب کر کے شدید بارشوں کا باعث بن رہی ہے۔ انہوں نے خبردار کیا کہ بارش کی شدت میں اضافہ، سیلابوں کو مزید سنگین بنا سکتا ہے۔
اقدامات اور حل کی ضرورت
ماہرین نے امریکہ پر زور دیا ہے کہ وہ ابتدائی وارننگ سسٹمز کو بہتر بنائے، بنیادی ڈھانچے کو مضبوط کرے، اور فوسل فیولز سے ہٹ کر شمسی اور ہوائی توانائی جیسے متبادل ذرائع کی طرف جائے۔ ڈیسلر نے خبردار کیا کہ اگر ان اقدامات پر عمل نہ کیا گیا تو شدید موسمی حالات مزید خراب ہوں گے۔
مارلن نے مؤثر قیادت اور عوامی دباؤ کی اہمیت پر زور دیتے ہوئے کہ
شہریوں کو اپنے رہنماؤں سے پوچھنا چاہیے کہ وہ ملک کو صاف توانائی کی طرف منتقل کرنے کے لیے کیا کر رہے ہیں؟
