پاکستانی سپر اسٹار فواد خان اور بھارتی اداکارہ وانی کپور کی رومانوی فلم عبیر گلال کی ریلیز پر پابندی کے بعد وانی کپور نے خاموشی توڑ دی ہے۔ دونوں ملکوں کے درمیان سیاسی کشیدگی کے باعث فلم پر پابندی عائد کی گئی تھی۔
بھارتی میڈیا کو دیے گئے ایک حالیہ انٹرویو میں وانی کپور نے فلم کی بندش پر اپنے خیالات کا اظہار کرتے ہوئے کہا کہ ’’جب ہم عبیر گلال کی شوٹنگ کر رہے تھے، تب حالات معمول پر تھے۔ فلمسازوں نے ریلیز کے لیے تمام قانونی تقاضے پورے کیے تھے۔‘‘
تاہم، بعد میں پاکستان اور بھارت کے درمیان حالات کشیدہ ہو گئے، جس کے بعد فلم کی ریلیز روکنے کا فیصلہ کیا گیا۔ اداکارہ کے مطابق، ’’ہم نے عوام اور حکومت دونوں کے جذبات کا احترام کرتے ہوئے فلم کو روک دیا کیونکہ ہمارا مقصد کسی کو تکلیف دینا نہیں تھا۔‘‘
وانی نے واضح کیا کہ فلم میں کسی بھی قسم کا متنازع مواد شامل نہیں، بلکہ یہ ایک محبت بھرا پیغام لیے بنائی گئی فلم ہے۔ ’’یہ فلم صرف اور صرف محبت کے لیے بنائی گئی ہے، کسی کی دل آزاری کے لیے نہیں،‘‘ انہوں نے کہا۔
یاد رہے کہ عبیر گلال میں فواد خان اور وانی کپور مرکزی کردار نبھا رہے ہیں، لیکن سرحد پار سیاسی تنازعے کے باعث یہ فلم تاخیر کا شکار ہوگئی۔ مداح اب بھی اس کی ریلیز کا بے چینی سے انتظار کر رہے ہیں۔
