پاکستان کی مقبول اداکارہ ہانیہ عامر حال ہی میں گلوکار عاصم اظہر کے کنسرٹ میں دیکھی گئیں۔ یہ کنسرٹ ریوائیو لانچ پارٹی کے دوران منعقد ہوا، جہاں دونوں کی موجودگی نے مداحوں میں ان کے پرانے تعلق کے بارے میں ایک بار پھر تجسس پیدا کر دیا۔
عینی شاہدین کے مطابق ہانیہ عامر سفید رنگ کے دلکش لباس اور چشمہ پہنے اپنی دوست اور اداکارہ یشما گل کے ساتھ موجود تھیں۔ انہوں نے جوش و خروش سے عاصم اظہر کی پرفارمنس کا لطف اٹھایا۔ عاصم، جو کئی مقبول گانوں کے خالق ہیں، نے اپنے وائرل گانے ترستی ہیں نگاہیں سے محفل کو گرما دیا جبکہ ہانیہ کو اس دوران مسکراتے اور محظوظ ہوتے دیکھا گیا۔
یہ منظر ایسے وقت سامنے آیا ہے جب کئی ہفتوں سے سوشل میڈیا پر دونوں کے دوبارہ قریب آنے کی افواہیں گردش کر رہی تھیں۔ اگرچہ چہ میگوئیاں جاری تھیں، لیکن اس تقریب سے پہلے دونوں کو ایک ساتھ عوامی طور پر نہیں دیکھا گیا تھا۔
ہانیہ عامر اور عاصم اظہر کا تعلق 2018 میں شروع ہوا تھا اور وہ اس دور میں پاکستان کی مقبول ترین جوڑیوں میں شمار ہوتے تھے۔ 2020 میں ہانیہ نے واضح کیا کہ وہ دونوں صرف اچھے دوست ہیں، جس کے بعد عاصم اظہر نے ڈیجیٹل کریئیٹر اور اداکارہ میراب علی سے منگنی کر لی۔
اس واقعے کے بعد سوشل میڈیا پر مداحوں کی جانب سے مختلف آراء سامنے آ رہی ہیں اور بہت سے لوگ یہ سوال کر رہے ہیں کہ آیا یہ ملاقات محض دوستی کی علامت ہے یا کچھ اور۔
