اسلام آباد – صوبائی وزیر صحت سندھ ڈاکٹر عذرا فضل پیچوہو نے کہا ہے کہ پاکستان میں بڑھتے ہوئے ذہنی صحت کے بحران سے نمٹنے کے لیے سب کو مل کر کام کرنا ہوگا۔ پہلے قومی مہم برائے ذہنی صحت کے دوران ویڈیو پیغام میں انہوں نے عوام سے اپیل کی کہ رہنمائی اور مدد کے لیے ٹیلے طبیب (1123) پر کال کریں۔
انہوں نے کہا کہ ماہرین ہر وقت سننے اور مدد فراہم کرنے کے لیے موجود ہیں اور ہمیں ذہنی صحت سے جڑی خاموشی اور بدنامی کو ختم کرنا ہوگا۔
ڈاکٹر عذرا نے وزارت صحت، برٹش ایشین ٹرسٹ اور دیگر شراکت داروں کا شکریہ ادا کیا اور زور دیا کہ ذہنی صحت کے ضابطہ اخلاق کو صحت کے پروگرامز اور ماہرین کی تعلیم میں شامل کیا جائے۔
انہوں نے کہا کہ کوئی ایک ادارہ اکیلا یہ مسئلہ حل نہیں کر سکتا، اس لیے حکومت، طبی شعبہ، تعلیمی ادارے، میڈیا، سول سوسائٹی اور کمیونٹیز کو مل کر آگاہی بڑھانی ہوگی، علاج کی سہولت بہتر بنانی ہوگی اور ذہنی صحت کو بنیادی صحت میں شامل کرنا ہوگا۔
