وزن کم کرنے والے مشہور انجیکشن کے بارے میں ماہرین نے خبردار کیا ہے کہ یہ انسان پر بڑھاپا 10 سال پہلے لے آتا ہے۔
نئی تحقیق میں ماہرین نے خبردار کیا ہے کہ وزن کم کرنے والے مشہور انجیکشن پٹھوں کے تیز نقصان کے باعث جسم کی عمر میں ایک دہائی کا اضافہ کر سکتے ہیں۔ کینیڈین محققین کے مطابق درمیانی عمر اور بزرگ افراد میں یہ ادویات کمزوری اور گرنے کے خطرات بڑھا سکتی ہیں۔
برطانوی اخبار ٹیلیگراف کے مطابق تحقیق سے پتا چلا کہ وزن کم کرنے کے عمل میں پٹھوں کو ہونے والا نقصان، بعض صورتوں میں موٹاپے کی سرجری، کینسر کے علاج یا 10 سال کی قدرتی عمر بڑھنے کے برابر ہو سکتا ہے۔ ایک مطالعے میں جسمانی ماس کا تقریباً 11 فی صد تک ضائع ہونا ریکارڈ کیا گیا، جب کہ دیگر شواہد میں وزن گھٹنے کا 20 سے 50 فی صد حصہ پٹھوں کے کم ہونے سے منسوب پایا گیا۔
ماہرین کا کہنا ہے کہ انجیکشن استعمال کرنے والوں کے لیے ہفتے میں 2 سے 3 مرتبہ طاقت کی مشقیں اور 150 منٹ کی معتدل سے شدید ورزش انتہائی ضروری ہے، کیوں کہ یہ پٹھوں اور ہڈیوں کے ماس کو برقرار رکھنے میں مدد دیتی ہے اور وزن دوبارہ بڑھنے کے امکانات کم کرتی ہے۔
محققین کے مطابق، وزن کم کرنے والی ادویات کی بڑھتی ہوئی مقبولیت کے پیش نظر یہ ضروری ہے کہ ان کے ساتھ جسمانی تربیت کو بھی اپنایا جائے، تاکہ ممکنہ طویل مدتی نقصان سے بچا جا سکے۔
مطالعات سے پتا چلتا ہے کہ ورزش نے وزن کم کرنے والی دواؤں کے استعمال کے دوران اور انھیں روکنے کے بعد پٹھوں اور ہڈیوں کے ماس کو برقرار رکھنے میں مدد کی، جب کہ فٹنس انجیکشن پر انحصار کرنے والوں کو مشورہ دیا جاتا ہے کہ وہ ہفتے میں 2 سے 3 بار مزاحمتی ایکسرسائز کریں۔
