وزیراعلیٰ پنجاب مریم نواز نے صوبے میں جاپان کا جدید ہیلتھ کیئر اور اسپتالوں کے انتظامی نظام متعارف کرانے کا اعلان کیا ہے تاکہ اسپتالوں کو جدید خطوط پر استوار کیا جا سکے اور مریضوں کو بہتر سہولیات فراہم کی جا سکیں۔
جاپان کے نیشنل سینٹر فار گلوبل ہیلتھ کے دورے کے دوران انہوں نے جدید طبی آلات، علاج کے نئے طریقے اور اسپتالوں کے انتظامی نظام کا جائزہ لیا۔ انہوں نے نواز شریف میڈیکل ڈسٹرکٹ قائم کرنے کا بھی اعلان کیا جو جاپان کے ماڈل پر مبنی ہوگا اور مریضوں کو سہولت دینے کے لیے جدید انفراسٹرکچر اور اسمارٹ مینجمنٹ پر مشتمل ہوگا۔
پنجاب حکومت جاپانی محققین کے ساتھ ذیابیطس، جگر کی بیماریوں اور وائرل انفیکشنز سمیت مختلف امراض کے علاج میں بھی تعاون کرے گی۔ ماہرین صحت کا کہنا ہے کہ یہ اقدام پنجاب کے ہیلتھ سسٹم کو جدید اور موثر بنانے میں سنگِ میل ثابت ہو سکتا ہے۔
