19 اگست،2025
صحرائے تھر کے علاقے ننگرپارکر میں بارش کے دوران آسمانی بجلی گرنے کے تین الگ الگ واقعات میں 23 مویشی ہلاک ہو گئے۔
تفصیلات کے مطابق تحصیل ننگرپارکر کے نواحی دیہات میں رات گئے اور صبح سویرے گرج چمک کے ساتھ موسلادھار بارش کے دوران بجلی گرنے کے واقعات پیش آئے۔ گاؤں مٹھڑیو ہالیپوٹا، روجھ اور ڈانبھاریو میں گھروں کے قریب جنگل میں آسمانی بجلی گرنے سے 21 گائیں اور 2 بکریاں موقع پر ہی ہلاک ہو گئیں۔
مقامی لوگوں کے مطابق اچانک ہونے والی بارش اور گرج چمک کے باعث مویشی جنگل میں کھلے مقام پر تھے، جس کے نتیجے میں بھاری نقصان ہوا۔
یہ بھی بتایا گیا ہے کہ گزشتہ روز مٹھی کے قریب آسمانی بجلی گرنے سے 17 مویشی ہلاک ہو گئے تھے جبکہ تین روز قبل اسلام کوٹ کے نزدیک 47 بکریاں بجلی گرنے سے لقمۂ اجل بن گئی تھیں۔
محکمۂ صحت نے شہریوں اور دیہی آبادی کو ہدایت کی ہے کہ گرج چمک کے دوران کھلے میدانوں اور کھیتوں میں جانے سے گریز کریں اور مویشیوں کو بھی محفوظ مقامات پر رکھنے کی کوشش کریں
