8 ستمبر،2025
نائب وزیرِ اعظم اسحاق ڈار نے کہا ہے کہ پاکستان کو ایک بار پھر سیلاب کی ہولناک صورتحال کا سامنا ہے جس سے لاکھوں افراد متاثر ہوئے ہیں۔
انٹر پارلیمانی اسپیکرز کانفرنس سے خطاب کرتے ہوئے ان کا کہنا تھا کہ پاکستان کا عالمی سطح پر کاربن کے اخراج میں حصہ ایک فیصد سے بھی کم ہے، لیکن اس کے باوجود یہ ملک ماحولیاتی تبدیلیوں کے شدید ترین اثرات جھیل رہا ہے۔
انہوں نے کہا کہ ماحولیاتی انصاف کے لیے سب کو مل کر آواز بلند کرنا ہو گی۔
اسحاق ڈار کا کہنا تھا کہ امن، استحکام اور ترقی کا آپس میں گہرا تعلق ہے اور پارلیمانی قیادت کے درمیان روابط اور تبادلۂ خیال کو فروغ دینا وقت کی اہم ضرورت ہے۔
ملک کے مختلف حصوں میں آنے والے حالیہ سیلاب سے بڑی تعداد میں لوگ بے گھر ہوئے، زرعی زمینیں زیرِ آب آگئیں اور بنیادی ڈھانچہ بری طرح متاثر ہوا ہے۔ ریسکیو اور امدادی سرگرمیاں جاری ہیں تاہم ماہرین کے مطابق نقصان کا حجم 2022 کے بدترین سیلاب سے کم نہیں ہوگا۔
