اسلام آباد: پاکستان 15 سے 27 ستمبر 2025 تک اپنی پہلی قومی ایچ پی وی ویکسینیشن مہم شروع کرے گا، جس کا مقصد بچیوں کو سروائیکل کینسر سے بچانا ہے۔
یہ مہم پنجاب، سندھ، اسلام آباد اور آزاد کشمیر میں 9 سے 14 سال کی 1 کروڑ 30 لاکھ بچیوں کو ایک خوراک پر مشتمل ویکسین لگانے کے لیے چلائی جائے گی۔
ڈوپاسی فاؤنڈیشن نے ایف ڈی آئی اور گیوی کے تعاون سے آگاہی ورکشاپ کا انعقاد کیا، جس میں ماہرین صحت اور سرکاری عہدیداروں نے کہا کہ اس مہم کی کامیابی میں ڈاکٹروں اور نجی اداروں کا کردار فیصلہ کن ہوگا۔
ڈاکٹر روزینہ خالد (ڈبلیو ایچ او) نے بتایا کہ سروائیکل کینسر پاکستانی خواتین میں دوسرا عام ترین مرض ہے اور اس سے اموات کی شرح بریسٹ کینسر سے بھی زیادہ ہے۔ اس لیے کم عمری میں ویکسین لگانا نہایت ضروری ہے۔
پاکستان اگلے تین برسوں میں 1 کروڑ 80 لاکھ بچیوں کو ویکسین دینے کا ہدف رکھتا ہے۔ اس اقدام کے ساتھ پاکستان دنیا کا 150واں ملک ہوگا جس نے ایچ پی وی ویکسین متعارف کروائی۔
