لاہور: صوبائی ڈیزاسٹر مینجمنٹ اتھارٹی (پی ڈی ایم اے) کے مطابق پنجاب بھر میں سیلابی صورتحال مزید سنگین ہوگئی ہے جس کے باعث اب تک 41 لاکھ سے زائد افراد متاثر جبکہ ہلاکتوں کی تعداد بڑھ کر 56 ہوگئی ہے۔
پی ڈی ایم اے حکام کے مطابق مسلسل بارشوں اور دریاؤں میں طغیانی کے باعث 4 ہزار 100 دیہات زیرِ آب آگئے ہیں۔ کھڑی فصلیں تباہ، سینکڑوں مکانات، اسکول اور سڑکیں سیلابی ریلوں میں بہہ گئیں۔
متاثرہ علاقوں میں ریسکیو اور ریلیف آپریشن جاری ہے اور ہزاروں متاثرہ خاندانوں کو عارضی شیلٹرز میں منتقل کیا جا رہا ہے۔ حکام کے مطابق امدادی کیمپ قائم کر دیے گئے ہیں جہاں متاثرین کو کھانے پینے کی اشیاء، ادویات اور خیمے فراہم کیے جا رہے ہیں۔
پی ڈی ایم اے کا کہنا ہے کہ اگر بارشوں کا سلسلہ جاری رہا تو بے گھر ہونے والے خاندانوں کی تعداد مزید بڑھ سکتی ہے۔ عوام سے اپیل کی گئی ہے کہ وہ نشیبی علاقوں سے محفوظ مقامات کی طرف منتقل ہوجائیں اور سرکاری ہدایات پر عمل کریں۔
دوسری جانب وزیراعلیٰ پنجاب نے ضلعی انتظامیہ کو ہدایت کی ہے کہ ریلیف سرگرمیوں کو مزید تیز کیا جائے اور متاثرہ افراد کو بنیادی سہولیات فوری طور پر فراہم کی جائیں۔
