اسلام آباد — وزیراعظم پاکستان شہباز شریف قطر پر اسرائیلی فضائی حملے کے بعد اظہار یکجہتی کے لیے ایک روزہ دورے پر دوحہ روانہ ہوگئے ہیں۔
بین الاقوامی میڈیا کے مطابق، وزیراعظم کے ہمراہ نائب وزیراعظم و وزیرِ خارجہ اسحاق ڈار، وزیرِ دفاع خواجہ محمد آصف، وزیرِ اطلاعات و نشریات عطاء اللہ تارڑ اور معاونِ خصوصی طارق فاطمی بھی شریک ہیں۔
دوحہ میں وزیراعظم شہباز شریف کی قطر کے امیر شیخ تمیم بن حماد الثانی اور شاہی خاندان کے دیگر افراد سے ملاقات متوقع ہے، جس میں خطے کی صورتحال اور دو طرفہ تعلقات پر تبادلہ خیال کیا جائے گا۔
یاد رہے کہ منگل کو اسرائیل نے دوحہ میں ایک عمارت پر فضائی حملہ کیا تھا، جس کے بارے میں کہا گیا کہ اس میں حماس کے رہنماؤں کو نشانہ بنایا گیا۔ اگرچہ حماس نے کسی رہنما کی ہلاکت کی تصدیق نہیں کی، تاہم قطری حکام اور حماس نے چھ افراد کے جاں بحق ہونے کی اطلاع دی ہے۔
پاکستان نے اس حملے کی شدید الفاظ میں مذمت کرتے ہوئے اسے "بین الاقوامی قوانین کی خلاف ورزی” قرار دیا ہے۔ وزیراعظم نے کہا کہ پاکستانی عوام اور حکومت قطر کے ساتھ کھڑے ہیں اور مشکل کی اس گھڑی میں ان کی مکمل حمایت کرتے ہیں۔
