کراچی (نمائندہ خصوصی) – تھانہ شاہ لطیف ٹاؤن کی حدود میں نامعلوم ملزمان کی فائرنگ سے ایک ہیڈ کانسٹیبل شہید ہو گیا۔ واقعے کے بعد علاقے میں خوف و ہراس پھیل گیا جبکہ پولیس نے جائے وقوعہ کو گھیرے میں لے کر تفتیش کا آغاز کر دیا ہے۔
وزیر داخلہ سندھ ضیاء الحسن لنجار نے واقعے کا سخت نوٹس لیتے ہوئے ایس ایس پی ملیر کو فوری طور پر ابتدائی پولیس اقدامات سے آگاہ کرنے کی ہدایت جاری کی ہے۔ انہوں نے تاکید کی کہ جائے وقوعہ سے جمع کی گئی شہادتوں اور عینی شاہدین کے بیانات کی روشنی میں تفتیش کو مؤثر اور نتیجہ خیز بنایا جائے۔
وزیر داخلہ نے حکم دیا کہ شہید ہیڈ کانسٹیبل کے اہل خانہ سے ملاقات کی جائے اور ان کے ساتھ اظہار یکجہتی کیا جائے۔ انہوں نے پولیس کلنگز میں ملوث گرفتار ملزمان کی تفصیلات بھی طلب کر لی ہیں۔
مزید برآں، ضیاء الحسن لنجار نے ہدایت کی کہ اس واقعے کی کامیاب تفتیش اور ملزمان کی فوری گرفتاری کے لیے ایک باصلاحیت اور تجربہ کار افسر کو ذمہ داری سونپی جائے تاکہ انصاف کے تقاضے پورے کیے جا سکیں۔
