نئی دہلی – بھارتی میڈیا کے مطابق بالی ووڈ اداکارہ دیشا پٹانی کے گھر کے باہر فائرنگ کرنے والے دو حملہ آور اتر پردیش کے علاقے غازی آباد میں پولیس مقابلے کے دوران مارے گئے۔
پولیس کے مطابق فائرنگ کا واقعہ 12 ستمبر کی صبح تقریباً ساڑھے چار بجے بریلی کے سول لائنز علاقے میں پیش آیا، جہاں نامعلوم افراد نے اداکارہ کی رہائش گاہ پر متعدد گولیاں چلائیں۔ واقعے کے وقت دیشا پٹانی اپنے اہل خانہ کے ہمراہ گھر پر موجود تھیں تاہم کوئی جانی نقصان نہیں ہوا۔
بعد ازاں اس حملے کی ذمہ داری کینیڈا میں مقیم گینگسٹر گولڈی برار کے گینگ نے قبول کی، جس کا تعلق کئی ہائی پروفائل جرائم سے جوڑا جاتا ہے۔
پولیس نے تصدیق کی کہ اس واقعے میں ملوث دونوں مشتبہ ملزمان اتوار کے روز غازی آباد میں مقابلے کے دوران ہلاک ہوئے۔ ان کی شناخت رویندر (رہائشی روہتک) اور ارون (رہائشی سونی پت) کے طور پر ہوئی۔
حکام کے مطابق دونوں افراد ایک بدنام زمانہ بین الاقوامی جرائم پیشہ گروہ سے تعلق رکھتے تھے۔ ملزمان کے قبضے سے بھاری مقدار میں اسلحہ برآمد ہوا، جن میں ایک گلوک پستول، ایک زیگانا پستول اور متعدد کارتوس شامل ہیں۔
