پاکستانی اداکارہ اور ماڈل عائشہ عمر نے اپنے آنے والے رئیلٹی شو لازوال عشق پر بڑھتی ہوئی تنقید کے بعد وضاحت پیش کی ہے۔ شو کا پرومو جاری ہونے کے بعد سے یہ سوشل میڈیا پر موضوعِ بحث بنا ہوا ہے۔
گزشتہ دنوں صارفین نے شو کو ’’ڈیٹنگ شو‘‘ قرار دے کر اس پر پابندی کا مطالبہ کیا اور اسے مقامی ثقافت کے لیے نامناسب قرار دیا۔ تنقید کا جواب دیتے ہوئے عائشہ عمر نے کہا کہ یہ پروگرام کسی قسم کا ڈیٹنگ شو نہیں بلکہ شادی پر مبنی رئیلٹی سیریز ہے۔
عائشہ عمر کے مطابق: ’’یہ شو محض ڈیٹنگ کے بارے میں نہیں ہے بلکہ اس کا مقصد زندگی کا ساتھی تلاش کرنا ہے۔ شرکاء پہلے سے طے شدہ جوڑے نہیں ہوں گے بلکہ دورانِ شو میل جول کے ذریعے تعلق قائم کریں گے، اور اس کا واحد مقصد شادی ہوگا۔‘‘
اداکارہ نے مزید کہا کہ اس پروگرام کو مغربی طرز کے ڈیٹنگ شوز کے ساتھ موازنہ نہ کیا جائے کیونکہ اس کا بنیادی خیال ازدواجی رشتے کو مقامی ثقافتی تناظر میں پیش کرنا ہے۔
یہ شو ٹی وی کے بجائے یوٹیوب پر نشر ہوگا، تاہم وضاحت کے باوجود عوامی حلقوں کی جانب سے اس پر پابندی کا مطالبہ جاری ہے۔
