ایشیز سیریز کے پہلے دو ٹیسٹ میں شکست کے بعد انگلینڈ کی کرکٹ ٹیم آرام کے لیے روانہ ہوگئی۔
میڈیا رپورٹس کے مطابق انگلش اسکواڈ نے پہلے سے طے شدہ منصوبے کے تحت کوئنز لینڈ کے ساحلی مقام سن شائن کوسٹ کے نوسا میں چھٹیاں گزارنے کا فیصلہ کیا ہے۔ ٹیم ایک ہفتے تک اس تفریحی مقام پر آرام کرے گی۔
انگلینڈ کی ٹیم ہفتے کے روز نوسا سے ایڈیلیڈ روانہ ہوگی، جہاں وہ تیسرے ٹیسٹ سے قبل صرف تین روز کی پریکٹس کرے گی۔ سیریز کا تیسرا ٹیسٹ 17 دسمبر سے شروع ہونا ہے۔
سیریز میں واپسی کا موقع برقرار رکھنے کے لیے انگلینڈ کے پاس اگلا میچ جیتنا لازمی ہے۔ انگلینڈ ٹیم پرتھ اور برسبین میں کھیلے گئے دونوں ٹیسٹ بدترین انداز میں ہار چکی ہے۔
واضح رہے کہ برسبین ٹیسٹ سے قبل انگلینڈ نے مسلسل پانچ ٹریننگ سیشنز کیے تھے۔ ہیڈ کوچ برینڈن میکلم کا کہنا تھا کہ شاید برسبین ٹیسٹ سے پہلے ٹیم نے بہت زیادہ پریکٹس کر لی تھی۔
