27 اکتوبر 2025
ویب ڈیسک
امریکا میں حکومت، میڈیا اور مذہبی اداروں پر عوامی اعتماد تیزی سے کم ہوتا جا رہا ہے، لیکن ایک نئی رپورٹ کے مطابق لوگ رہنمائی اور امید کے لیے بائبل کی طرف دوبارہ رجوع کر رہے ہیں۔
امریکن بائبل سوسائٹی کی تازہ رپورٹ کے مطابق صرف 36 فیصد امریکی بائبل کو مکمل طور پر درست مانتے ہیں، جبکہ 39 فیصد اس سے اتفاق نہیں کرتے۔ تقریباً ہر پانچ میں سے ایک شخص بائبل کو لوگوں پر قابو پانے کا ذریعہ سمجھتا ہے۔
اس کے باوجود نوجوان نسل میں بائبل سے دلچسپی بڑھ رہی ہے۔ رپورٹ کے مطابق بائبل پڑھنے کا رجحان جنریشن زی میں 36 فیصد اور ملینیئلز میں حیران کن طور پر 290 فیصد بڑھا ہے۔
ڈاکٹر جان پلیک، جو امریکن بائبل سوسائٹی کے چیف انوویشن آفیسر ہیں، کا کہنا ہے:
"اعتماد ہمیشہ تعلقات پر قائم ہوتا ہے۔ جب تعلقات ٹوٹتے ہیں تو ایمان اور اعتماد بھی متزلزل ہو جاتا ہے۔”
رپورٹ میں بتایا گیا ہے کہ خاندان امریکا کا سب سے قابلِ اعتماد ادارہ ہے، جس پر 55 فیصد لوگ بھروسہ کرتے ہیں، جبکہ مذہبی اداروں پر 29 فیصد، اور میڈیا و حکومت پر بالترتیب صرف 5 اور 6 فیصد لوگ اعتماد کرتے ہیں۔
اگرچہ امریکا میں مذہب سے دور افراد ("ریلیجس نانز”) کی تعداد اب تقریباً 25 فیصد ہو چکی ہے، لیکن اس کے باوجود پچھلے سال کے دوران ایک کروڑ نئے بائبل پڑھنے والے شامل ہوئے ہیں جو اس بات کا ثبوت ہے کہ روحانی جستجو اب بھی زندہ ہے۔
ڈاکٹر پلیک کے مطابق، "امریکا میں بائبل کی حالت امید افزا ہے۔ میں نے کئی دہائیوں میں اتنی دلچسپی اور تجسس کبھی نہیں دیکھا۔”
