کراچی: سہراب گوٹھ کے علاقے الاصف اسکوائر قیوم آباد کالونی قبرستان کے قریب نامعلوم مسلح افراد نے گھر میں گھس کر فائرنگ کرکے ایک شخص کو قتل کردیا۔
پولیس کے مطابق واقعہ پیر کی صبح پیش آیا جب دو مسلح ملزمان گھر کے دروازے پر دستک دینے کے بعد اندر داخل ہوئے اور فائرنگ کرکے گھر میں سوئے ہوئے شخص کو ہلاک کردیا، ملزمان فائرنگ کے بعد موٹر سائیکل پر فرار ہوگئے۔
ایدھی ایمبولینس کے ذریعے مقتول کی لاش قانونی کارروائی کے لیے عباسی شہید اسپتال منتقل کی گئی جہاں اس کی شناخت 25 سالہ زرین خان ولد نور احمد کے نام سے ہوئی۔ پولیس کے مطابق مقتول افغان شہری اور پیشے کے لحاظ سے قصاب تھا۔
ایس ایچ او سہراب گوٹھ ممتاز مروت نے بتایا کہ ابتدائی تفتیش کے مطابق واقعہ ذاتی دشمنی کا نتیجہ معلوم ہوتا ہے۔ پولیس نے جائے وقوعہ سے شواہد اکٹھے کرکے واقعے کی مختلف پہلوؤں سے تحقیقات شروع کردی ہیں۔
