اسلام آباد: پمز اسپتال میں سینئر ڈاکٹر کی جانب سے زیر تربیت ڈاکٹر پر مبینہ طور پر بدترین تشدد کا افسوسناک واقعہ پیش آیا ہے۔
تفصیلات کے مطابق متاثرہ ڈاکٹر ابرہیم نے واقعے کے خلاف تھانہ کراچی کمپنی میں تحریری درخواست جمع کرادی ہے۔
درخواست کے متن کے مطابق ڈاکٹر ابرہیم ڈیوٹی کے سلسلے میں برن سینٹر پہنچے تو ایک گارڈ نے انہیں روکا، جس کے بعد سینئر ڈاکٹر عبدالخالق اپنے دیگر ساتھیوں کے ہمراہ آئے اور ان پر تشدد شروع کردیا۔
ڈاکٹر ابرہیم نے الزام لگایا کہ تشدد کے دوران ڈاکٹر عبدالخالق نے ان کا موبائل فون توڑ دیا اور ساتھیوں کے ہمراہ انہیں تقریباً دو گھنٹے تک کمرے میں قید رکھا۔
درخواست میں مزید کہا گیا ہے کہ ڈاکٹر عبدالخالق کی جانب سے نوکری سے نکالنے اور جان سے مارنے کی دھمکیاں بھی دی جارہی ہیں۔ متاثرہ ڈاکٹر نے متعلقہ حکام سے مطالبہ کیا ہے کہ ڈاکٹر عبدالخالق کے خلاف فوری کارروائی کی جائے۔
