کیمبرج انٹرنیشنل ایجوکیشن (CIE) نے اے ایس اور اے لیول ریاضی کے بعض پرچوں کے لیک ہونے کے بعد تحقیقات تیز کر دی ہیں اور متاثرہ امتحانات کے مستقبل سے متعلق حتمی فیصلہ جلد کرنے کا عندیہ دیا ہے۔ ادارے کے مطابق لیک ہونے والے پرچوں کے دائرہ کار اور اثرات کا جائزہ لیا جا رہا ہے تاکہ طلبہ کے ساتھ انصاف کو یقینی بنایا جا سکے۔
کیمبرج نے تصدیق کی ہے کہ اے ایس لیول میتھمیٹکس پیپر 52 (9709) امتحان سے قبل غیر مجاز طور پر شیئر کیا گیا تھا، جس کے بعد پاکستان میں ہونے والا میتھمیٹکس پیپر 32 ملتوی کر دیا گیا۔ ادارے نے اعلان کیا کہ متاثرہ امتحان کے لیے نیا پرچہ تیار کیا جائے گا اور نظرثانی شدہ شیڈول جاری کیا جائے گا۔
امتحانی بورڈ کا کہنا ہے کہ مختلف رپورٹس اور شواہد کی بنیاد پر تحقیقات جاری ہیں اور اسی عمل کے بعد یہ فیصلہ کیا جائے گا کہ متاثرہ پرچوں کے نتائج برقرار رکھے جائیں، دوبارہ امتحان لیا جائے یا کوئی متبادل گریڈنگ پالیسی اختیار کی جائے۔ کیمبرج کے مطابق اس کی اولین ترجیح طلبہ کو نقصان سے بچانا اور امتحانی نظام کی ساکھ برقرار رکھنا ہے۔
پرچہ لیک ہونے کے واقعات کے باعث طلبہ اور والدین میں بے چینی پائی جا رہی ہے، تاہم کیمبرج نے واضح کیا ہے کہ اے ایس اور اے لیول نتائج کے اجرا کی تاریخ فی الحال تبدیل نہیں کی گئی۔ ادارے نے مزید کہا کہ ذمہ دار عناصر کے خلاف قانونی کارروائی کے امکانات بھی زیر غور ہیں۔
