دسمبر 6، 2025
ویب ڈیسک
پاکستان نے کہا ہے کہ کسی بھی عبادت گاہ کی بے حرمتی مذہبی مساوات کی سنگین خلاف ورزی ہے اور یہ تمام برادریوں کے درمیان اعتماد اور باہمی احترام کو نقصان پہنچاتی ہے۔ دفتر خارجہ کے ترجمان طاہر اندرا بی نے یہ بات 6 دسمبر کو بابری مسجد کی شہادت کی برسی کے تناظر میں کہی۔
انہوں نے کہا کہ بابری مسجد پاکستان کی اجتماعی یادداشت کا اہم حصہ ہے، اور 1992 میں اس کی شہادت آج بھی دکھ اور تشویش کا باعث بنتی ہے۔ ان کا کہنا تھا کہ مذہبی ورثے اور مقدس مقامات کا تحفظ عالمی برادری کی مشترکہ ذمہ داری ہے اور مسلم مذہبی علامات پر حملوں کا شفاف تحقیقات اور انصاف کے ساتھ جواب ہونا چاہیے۔
ترجمان نے بھارت میں مسلمانوں کی مسلسل محرومی پر تشویش کا اظہار کیا اور کہا کہ ہندو انتہا پسند گروہ ریاستی سرپرستی میں اقلیتوں کو مزید الگ تھلگ کرنے کی کوشش کر رہے ہیں۔ انہوں نے اقوام متحدہ سمیت عالمی اداروں سے مطالبہ کیا کہ مسلم مذہبی ورثے کے تحفظ کو یقینی بنائیں اور ایسے واقعات دوبارہ نہ ہونے دیں۔
پاکستان نے ملک میں تمام اقلیتوں کے حقوق اور مذہبی آزادی کے تحفظ کے عزم کا اعادہ کیا۔ ترجمان نے بھارت پر زور دیا کہ وہ رواداری، شمولیت اور مساوی شہریت کے اصولوں کو فروغ دے تاکہ تمام مذہبی اور ثقافتی برادریوں کے درمیان احترام برقرار رہے۔
