آرمی چیف جنرل عاصم منیر کو فیلڈ مارشل کے اعزاز سے نوازے جانے کی تقریب کے دوران انہوں نے پاکستانی میڈیا کو خراجِ تحسین پیش کرتے ہوئے کہا کہ "میڈیا ہمارا فخر ہے، آپ لوگوں نے دنیا کو بتایا کہ ہم صرف سچ بولتے ہیں۔”
ایوانِ صدر میں سینئر صحافیوں سے گفتگو کرتے ہوئے فیلڈ مارشل سید عاصم منیر کا کہنا تھا کہ "میڈیا ہماری طاقت کا ستون ہے، آپ نے ہمارے ساتھ مل کر ہر میدان میں اپنا کردار ادا کیا۔”
اس موقع پر صدرِ مملکت آصف علی زرداری اور وزیراعظم شہباز شریف نے جنرل عاصم منیر کو ’’بیٹن آف فیلڈ مارشل‘‘ پیش کی، جسے ملکی تاریخ کا ایک اہم لمحہ قرار دیا گیا۔ تقریب میں غیر ملکی سفیروں، اعلیٰ عسکری اور سول حکام نے شرکت کی۔
صدر زرداری کا کہنا تھا کہ "عاصم منیر کو فیلڈ مارشل کا اعزاز دینا ایک فخر کا لمحہ ہے، انہوں نے فرنٹ لائن پر رہتے ہوئے مادرِ وطن کا دفاع کیا، اور قوم کی بہادر افواج کے شانہ بشانہ دشمن کے ہر چیلنج کا مقابلہ کیا۔”
انہوں نے مزید کہا کہ پاکستان امن کا خواہاں ہے، لیکن ہماری امن پسندی کو ہرگز کمزوری نہ سمجھا جائے۔ آج کی تقریب ان سپوتوں کے نام ہے جنہوں نے قوم کے وقار کے لیے قربانیاں دیں۔
