پاکستان اور بھارت کے درمیان حالیہ فضائی جھڑپ کے دوران رافیل لڑاکا طیاروں کے مبینہ طور پر مار گرائے جانے کی خبروں پر فرانسیسی فوج نے پہلی بار ردعمل دیا ہے۔
پیرس میں ایک پریس بریفنگ کے دوران فرانسیسی فوج کے ترجمان نے کہا کہ فرانس اس صورتحال کا بغور جائزہ لے رہا ہے، اور رافیل طیاروں کی کارکردگی سے متعلق تفصیلات اکٹھی کر رہا ہے۔
ترجمان نے بتایا کہ "ہم بھارت کے ساتھ براہ راست رابطے میں ہیں تاکہ درست معلومات حاصل کی جا سکیں۔ فرانس اس تجربے سے سیکھنے کا خواہاں ہے تاکہ مستقبل میں مزید بہتری لائی جا سکے۔”
انہوں نے اس بات کی تصدیق کی کہ اگر یہ اطلاعات درست ثابت ہوتی ہیں تو یہ رافیل طیاروں کی 20 سالہ آپریشنل تاریخ میں پہلی بار ہوگا کہ وہ کسی لڑائی میں تباہ ہوئے ہوں۔
فرانسیسی فوج کا کہنا ہے کہ پاکستان اور بھارت کے درمیان اس جھڑپ کے حوالے سے اب تک کی اطلاعات غیر واضح ہیں، اور بہت سے پہلو ابھی تک تصدیق طلب ہیں۔
یاد رہے کہ 7 مئی کو سامنے آنے والی خبروں کے مطابق پاکستان نے مبینہ طور پر بھارت کے 7 طیارے مار گرائے تھے، جن میں 3 سے 4 رافیل شامل ہونے کی رپورٹس بھی سامنے آئیں، تاہم اس کی آزاد ذرائع سے تصدیق تاحال ممکن نہیں ہو سکی۔
دفاعی تجزیہ کاروں کا کہنا ہے کہ ایسے واقعات میں مکمل شواہد کے بغیر حتمی رائے قائم کرنا قبل از وقت ہوگا۔ مختلف بین الاقوامی ادارے معاملے کی مزید تصدیق کا انتظار کر رہے ہیں۔
