ہائر ایجوکیشن کمیشن (ایچ ای سی) نے سوشل میڈیا پر گردش کرنے والے ایک جعلی نوٹیفکیشن کے حوالے سے طلبہ اور انجینئرنگ گریجویٹس کو خبردار کر دیا ہے۔ اس دستاویز میں انجینئرنگ ٹیکنالوجی کی ڈگریوں اور روایتی انجینئرنگ ڈگریوں کو مساوی قرار دینے کا دعویٰ کیا گیا تھا، تاہم ایچ ای سی نے واضح کیا ہے کہ اس نے ایسا کوئی نوٹیفکیشن جاری نہیں کیا۔
29 اکتوبر 2026 کی تاریخ درج اس مبینہ نوٹیفکیشن میں دعویٰ کیا گیا تھا کہ بیچلر آف ٹیکنالوجی (آنرز) اِن انجینئرنگ اور بی ایس سی انجینئرنگ ٹیکنالوجی (آنرز) کی ڈگریوں کو بیچلر آف انجینئرنگ (BE) یا بی ایس سی انجینئرنگ کے مساوی تسلیم کر لیا گیا ہے۔
دستاویز میں یہ دعویٰ بھی کیا گیا کہ ڈپلومہ آف ایسوسی ایٹ انجینئرنگ (DAE) کو متعلقہ انجینئرنگ شعبے میں 14 سالہ تعلیم کے برابر قرار دیا گیا ہے۔ اس کے تحت ڈی اے ای رکھنے والے امیدواروں کو یونیورسٹیوں کے داخلہ معیار کے مطابق بی ای، بی ایس سی انجینئرنگ اور انجینئرنگ ٹیکنالوجی پروگرامز میں براہِ راست اگلے مرحلے میں داخلے کی اجازت دینے کا بھی ذکر کیا گیا تھا۔
تاہم ایچ ای سی نے ان تمام دعوؤں کو مسترد کرتے ہوئے کہا ہے کہ مذکورہ دستاویز کمیشن کی جانب سے جاری نہیں کی گئی۔ کمیشن نے طلبہ، گریجویٹس، عوام اور متعلقہ اداروں کو ہدایت کی ہے کہ وہ اس گمراہ کن نوٹیفکیشن پر اعتماد نہ کریں اور نہ ہی اسے مزید شیئر کریں۔
ایچ ای سی نے عوام پر زور دیا ہے کہ ڈگریوں کی منظوری، مساوات اور تعلیمی پالیسیوں سے متعلق مستند معلومات کے لیے صرف کمیشن کی سرکاری ویب سائٹ اور تصدیق شدہ سوشل میڈیا اکاؤنٹس سے رجوع کریں۔
