پاکستان کی جامعات میں طلبہ کے لیے انٹرن شپ کو لازمی قرار دیا گیا ہے تاکہ انہیں عملی تجربہ حاصل ہو اور تعلیم مکمل کرنے کے بعد روزگار کے بہتر مواقع میسر آسکیں۔ یہ بات وفاقی تعلیم و پیشہ ورانہ تربیت کی پارلیمانی سیکریٹری رابعہ نسیم فاروقی نے قومی اسمبلی میں بتائی۔
سوالات کے جواب میں انہوں نے کہا کہ پاکستان میں سرکاری اور نجی شعبوں کی مجموعی طور پر 282 جامعات ہیں۔ ان کے مطابق انڈرگریجویٹ تعلیم کے لیے انٹرن شپ کی شرط ہائر ایجوکیشن کمیشن کی پالیسی کے تحت 2023 میں متعارف کرائی گئی تھی۔
پالیسی کے مطابق طلبہ کے ڈگری پروگرام سے متعلق انٹرن شپ کے لیے تین اکیڈمک کریڈٹ آورز مختص کیے گئے ہیں۔ ہائر ایجوکیشن کمیشن جامعات میں اس شرط پر عمل درآمد کی نگرانی کر رہا ہے۔
رابعہ نسیم فاروقی نے بتایا کہ وزیراعظم شہباز شریف کی ہدایت پر جامعات میں یوتھ ڈیولپمنٹ سینٹرز بھی قائم کیے گئے ہیں۔ ان مراکز کا مقصد طلبہ اور فارغ التحصیل نوجوانوں کو ملازمت کے لیے تیار کرنا اور انہیں تعلیمی و پیشہ ورانہ رہنمائی فراہم کرنا ہے۔
یہ مراکز طلبہ کو ملازمت کے مواقع اور آجروں کی توقعات سمجھنے میں مدد دیتے ہیں، جبکہ جامعات اور صنعتی شعبے کے نمائندوں کے درمیان رابطے کو بھی فروغ دیتے ہیں۔
اس اقدام کا مقصد اعلیٰ تعلیم اور ملازمت کی منڈی کے درمیان رابطہ مضبوط بنانا ہے تاکہ طلبہ ڈگری مکمل کرنے سے پہلے عملی مہارتیں حاصل کرسکیں۔ طلبہ انٹرن شپ کے دورانیے، جگہ کے انتظامات اور جانچ کے طریقۂ کار کی تصدیق اپنی متعلقہ یونیورسٹی سے کریں۔
