ستمبر 13، 2025
ویب ڈیسک
گڈو بیراج کے مقام پر دریائے سندھ میں پانی کی سطح تیزی سے بلند ہورہی ہے جس کے باعث اونچے درجے کے سیلاب کی صورتحال پیدا ہوگئی ہے۔ محکمہ آبپاشی کے کنٹرول روم کے مطابق بیراج پر پانی کی آمد 5 لاکھ 44 ہزار 658 کیوسک جبکہ اخراج 5 لاکھ 14 ہزار 51 کیوسک ریکارڈ کیا گیا ہے۔
رپورٹ کے مطابق گزشتہ 24 گھنٹوں کے دوران پانی کی سطح میں 31 ہزار 996 کیوسک کا اضافہ ہوا ہے، جبکہ ماہرین نے آئندہ 24 گھنٹوں میں مزید اضافے کا خدشہ ظاہر کیا ہے۔
بلند پانی کے دباؤ کے باعث دریائے سندھ کے کچے کے علاقے مکمل طور پر زیر آب آگئے ہیں۔ اس سیلابی ریلے نے سیکڑوں ایکڑ پر کھڑی کپاس، منگی اور چاول کی فصلوں کو تباہ کردیا ہے، جس سے کسانوں کو بھاری مالی نقصان برداشت کرنا پڑ رہا ہے۔
ریسکیو ٹیمیں اور مقامی انتظامیہ متاثرہ دیہات میں پہنچ کر لوگوں کو محفوظ مقامات پر منتقل کرنے میں مصروف ہیں۔ حکام نے نشیبی علاقوں کے مکینوں کو فوری طور پر انخلا کی ہدایت بھی کی ہے۔
ماہرین کا کہنا ہے کہ اگر دریائے سندھ میں پانی کی آمد کا یہ سلسلہ کم نہ ہوا تو سیلابی صورت حال مزید سنگین شکل اختیار کرسکتی ہے۔
