فیصل آباد: فیصل آباد سے تعلق رکھنے والی حرا قیصر نے پاکستان آئیڈل 2026 کا ٹائٹل جیت لیا ہے۔ اتوار کو ہونے والے گرینڈ فائنل میں کامیابی کے بعد حرا کو 15 لاکھ روپے نقد انعام دیا گیا۔
متوسط طبقے سے تعلق رکھنے والی حرا نے پورے مقابلے کے دوران اپنی آواز اور پُراعتماد پرفارمنس سے ناظرین اور ججز کی توجہ حاصل کی۔ گرینڈ فائنل میں ان کی آخری پرفارمنس نے انہیں سیزن کی نمایاں فنکاروں میں شامل کردیا۔
میزبان شفاعت علی نے حرا کو فاتح کا ایوارڈ پیش کیا۔ حرا اپنے شیر خوار بیٹے کو گود میں اٹھائے اسٹیج پر پہنچیں اور ایوارڈ وصول کرتے ہوئے جذبات پر قابو نہ رکھ سکیں۔
حرا کی کامیابی کے اعلان کے بعد اسٹیج پر جشن کا سماں بندھ گیا اور فضا میں رنگ برنگی کاغذی پھوار بکھیر دی گئی۔ دیگر شرکا اور ججز نے حرا کو گھیر کر مبارکباد دی۔
گلوکار راحت فتح علی خان، عاطف اسلم، بلال مقصود اور زیب بنگش جبکہ اداکار فواد خان بھی نومنتخب فاتح کے ساتھ جشن میں شریک ہوئے۔
اپنی کامیابی پر جذباتی حرا نے شو اور اپنی حمایت کرنے والے تمام افراد کا شکریہ ادا کرتے ہوئے کہا کہ ان کے پاس خوشی بیان کرنے کے لیے الفاظ نہیں اور وہ پاکستان آئیڈل کی بہت شکر گزار ہیں۔
گرینڈ فائنل میں حرا نے مکال حسن کا گانا پیش کیا جس پر عاطف اسلم اور ججز نے حوصلہ افزا ردعمل دیا۔ ان کی پرفارمنس میں آواز پر گرفت اور اسٹیج پر اعتماد نمایاں رہا، جس نے انہیں مقابلے کے آخری مرحلے تک پہنچنے میں اہم کردار ادا کیا۔
پاکستان آئیڈل کے فائنل میں دیگر امیدواروں میں خانپور کی ماہِم طاہر، کراچی کے وقار حسین اور تراب نفیس، لاہور کی سمیہ گوہر اور ڈیرہ غازی خان کے اریان نوید بھٹی شامل تھے۔
فائنلسٹ امیدواروں کو بھی ان کی کارکردگی پر انعامات دیے گئے اور رپورٹس کے مطابق ہر فائنلسٹ کو 5 لاکھ روپے کی انعامی رقم ملی۔
حرا قیصر کی فتح کے ساتھ پاکستان آئیڈل 2026 کا سیزن ایک جذباتی اور یادگار اختتام کو پہنچا، جبکہ ایکسپریس انٹرٹینمنٹ کے اشتراک سے شو نے ملک بھر میں ابھرتے ہوئے گلوکاروں کی صلاحیتیں ناظرین تک پہنچانے میں اہم کردار ادا کیا۔
