پاکستان سپر لیگ (پی ایس ایل) 2026 کے روڈ شو کے دوران قومی ٹیم کے اسٹار بیٹر بابر اعظم نے بتایا کہ پی ایس ایل نے انہیں نہ صرف پہچان دی بلکہ اسی لیگ کی بدولت وہ اپنے پسندیدہ کھلاڑی اے بی ڈویلیئرز سے بھی مل سکے۔
اوپنر صاحبزادہ فرحان کا کہنا تھا کہ وہ گزشتہ 17 سال سے کرکٹ کھیل رہے ہیں لیکن پی ایس ایل کے بعد ہی لوگوں نے انہیں پہچاننا شروع کیا۔
فاسٹ بولر حارث رؤف نے کہا کہ اگر وہ کرکٹر نہ بنتے تو شاید کسی ملازمت میں مصروف ہوتے، ان کے منتخب ہونے کی خبر بھی گھر والوں کو جیو نیوز کے ذریعے ملی۔
لندن کے لارڈز میں منعقد روڈ شو میں بابر اعظم نے بتایا کہ پی ایس ایل نے انہیں دنیا بھر کے بڑے کرکٹرز جیسے کمار سنگاکارا، مہیلا جے وردھنے اور آندرے رسل سے ملنے کا موقع دیا۔ لیکن ان سب میں سب سے خاص ملاقات اے بی ڈویلیئرز سے ہوئی، جن سے انہوں نے بہت کچھ سیکھا۔
صاحبزادہ فرحان نے مزید کہا کہ پی ایس ایل میں نہ صرف انہیں پہچان ملی بلکہ انہوں نے غیر ملکی کرکٹرز کے ساتھ کھیل کر اور بابر اعظم کے ساتھ رہ کر بہت کچھ سیکھا۔
حارث رؤف کا کہنا تھا کہ پی ایس ایل ان کے کیریئر کے لیے سب کچھ ہے، اگر وہ اس لیگ کا حصہ نہ بنتے تو شاید آج کرکٹ میں نہ ہوتے۔
سابق کپتان وسیم اکرم نے بھی روڈ شو کے دوران لوکل پلیئرز کے غیر ملکی کھلاڑیوں کے ساتھ کھانے سے متعلق ایک دلچسپ واقعہ سنا کر محفل کو خوشگوار بنا دیا۔
