ڈی جی آئی ایس پی آر لیفٹننٹ جنرل احمد شریف چوہدری نے بھارت کو خبردار کرتے ہوئے کہا ہے کہ وہ اپنے بیانیے کی وجہ سے آگ سے کھیل رہا ہے۔ ان کا کہنا ہے کہ پاکستان ایک امن پسند ملک ہے، لیکن اگر بھارت جنگ چاہتا ہے تو ہم اس کے لیے ہر وقت تیار ہیں۔
برطانوی نشریاتی ادارے بی بی سی کو دیے گئے انٹرویو میں ترجمان پاک فوج نے واضح کیا کہ پاکستان اور بھارت کے درمیان ایٹمی جنگ ایک بےوقوفی ہوگی جو دونوں ممالک کی باہمی تباہی کا سبب بن سکتی ہے۔ انہوں نے زور دے کر کہا کہ جوہری جنگ نہ صرف ناقابل تصور بلکہ انتہائی نامعقول خیال ہے۔
لیفٹننٹ جنرل احمد شریف نے کہا کہ بھارت اپنے داخلی سیاسی مقاصد کے لیے ایک مصنوعی بیانیہ گھڑ رہا ہے، جس سے خطے میں کشیدگی بڑھ رہی ہے۔ ان کے مطابق بھارت کی جانب سے ماضی میں بھی ایسے بیانیے گھڑے گئے، لیکن دنیا اب جان چکی ہے کہ بھارتی مؤقف جھوٹا ہے۔
ترجمان پاک فوج نے 6 اور 7 مئی کو پاکستان کی جانب سے بھارتی جارحیت کا مؤثر جواب دیے جانے کا ذکر کرتے ہوئے کہا کہ پاکستان نے بھارت کے 6 جنگی طیارے گرائے، مزید بھی گرائے جا سکتے تھے لیکن قیادت نے ذمہ داری کا مظاہرہ کیا۔
انہوں نے کہا کہ سیز فائر سے قبل بھارت کے ڈی جی ایم او نے رابطہ کیا اور بات چیت کی خواہش ظاہر کی، لیکن پاکستان نے واضح کر دیا کہ بات چیت صرف اپنے ردعمل کے بعد ہی ممکن ہوگی۔
ڈی جی آئی ایس پی آر نے بھارتی وزیر خارجہ کے اس دعوے کو بھی مسترد کر دیا جس میں کہا گیا تھا کہ میزائل حملوں سے قبل پاکستان کو آگاہ کیا گیا تھا۔ ان کے مطابق یہ "بھارتی میڈیا کا ایک مزاحیہ بیانیہ ہے” اور پاکستان کی انٹیلی جنس بھارتی اطلاعات پر انحصار نہیں کرتی۔
آخر میں انہوں نے واضح کیا کہ پاکستان دہشتگردی کے خلاف ہے اور اگر کسی پاکستانی کے ملوث ہونے کے ثبوت فراہم کیے جائیں تو پاکستان خود کارروائی کرے گا۔
