اسلام آباد: پاکستان تحریک انصاف کے بانی اور سابق وزیراعظم عمران خان کی سابق اہلیہ جمائما گولڈ اسمتھ نے برطانوی حکومت سے مطالبہ کیا ہے کہ وہ عمران خان کے ساتھ مبینہ ناروا سلوک کے معاملے پر خاموش نہ رہے اور اس حوالے سے مداخلت کرے۔
جمائما نے سماجی رابطے کی ویب سائٹ ایکس پر برطانوی وزیراعظم اینڈی برنہم اور وزیر خارجہ ایڈ ملی بینڈ کو مخاطب کرتے ہوئے سوال کیا کہ برطانیہ مزید کتنی دیر خاموش رہے گا۔
جمائما، جن کے عمران خان سے دو بیٹے ہیں، نے دعویٰ کیا کہ ان کے سابق شوہر کو گزشتہ تین برس سے سیاسی مخالفین کی جانب سے سخت حالات کا سامنا ہے۔
انہوں نے کہا کہ عمران خان کو مبینہ طور پر تین سال سے تنہائی میں رکھا گیا ہے، جبکہ تقریباً 10 ماہ سے ان کے خاندان کو ان سے رابطے کی اجازت نہیں دی گئی۔ جمائما نے یہ بھی الزام عائد کیا کہ عمران خان کو کتابوں، وکلا اور ڈاکٹروں تک بنیادی رسائی سے محروم رکھا گیا۔
انہوں نے اقوام متحدہ کے نیلسن منڈیلا رولز کا حوالہ دیتے ہوئے کہا کہ طویل عرصے تک قیدِ تنہائی انسانی حقوق کے بین الاقوامی اصولوں سے مطابقت نہیں رکھتی۔
جمائما کا بیان ایسے وقت میں سامنے آیا ہے جب سپریم کورٹ نے عمران خان کے طبی معائنے اور علاج کے حوالے سے حکام کو ہدایات جاری کی تھیں، جن میں مناسب طبی سہولیات، ذاتی ڈاکٹر تک رسائی، خاندان سے باقاعدہ ملاقاتیں اور بیٹوں سے ہفتے میں دو مرتبہ ٹیلی فون پر بات چیت شامل تھی۔
تاہم جمائما کے مطابق ان عدالتی ہدایات پر مکمل عمل درآمد نہیں کیا جا رہا، جس کے باعث ان کے بقول معاملہ محض پاکستان کا سیاسی مسئلہ نہیں رہا بلکہ انسانی حقوق کا معاملہ بن چکا ہے۔
73 سالہ عمران خان اگست 2023 سے راولپنڈی میں قید ہیں اور مختلف مقدمات میں سزاؤں کا سامنا کرچکے ہیں۔ عمران خان اور پی ٹی آئی ان مقدمات کو مسلسل سیاسی بنیادوں پر قائم کیے گئے مقدمات قرار دیتے رہے ہیں۔
حالیہ دنوں میں عمران خان کو طبی معائنے کے لیے پاکستان انسٹی ٹیوٹ آف میڈیکل سائنسز لے جایا گیا تھا، جہاں معائنے کے بعد انہیں دوبارہ اڈیالہ جیل منتقل کردیا گیا۔
جمائما نے عمران خان کے برطانیہ کے ساتھ دیرینہ تعلقات کا بھی ذکر کیا۔ انہوں نے بتایا کہ عمران نے آکسفورڈ یونیورسٹی سے تعلیم حاصل کی، یونیورسٹی کی کرکٹ ٹیم کی کپتانی کی اور کئی برس تک انگلینڈ میں کاؤنٹی کرکٹ کھیلی۔
انہوں نے عمران خان کی فلاحی سرگرمیوں کا حوالہ دیتے ہوئے کہا کہ ان میں پاکستان میں کینسر ہسپتال اور ایک یونیورسٹی کا قیام بھی شامل ہے۔
جمائما نے کہا کہ وہ اس سے قبل بھی برطانوی حکومت سے مداخلت کی اپیل کرچکی ہیں۔ انہوں نے مطالبہ کیا کہ برطانیہ واضح طور پر پاکستان پر زور دے کہ وہ سپریم کورٹ کے احکامات پر عمل کرے، عمران خان کو مناسب طبی سہولیات اور خاندان سے ملاقات کا حق دے اور ان کی طویل تنہائی ختم کی جائے۔
