پشاور: وزیراعلیٰ خیبر پختونخوا علی امین گنڈاپور کا استعفیٰ منظور نہ ہوسکا۔ گورنر خیبر پختونخوا فیصل کریم کنڈی نے استعفے میں اختلافات کی نشاندہی کرتے ہوئے اسے اعتراض لگا کر واپس کردیا ہے۔
گورنر فیصل کنڈی کے مطابق علی امین گنڈاپور کے نام سے دو متضاد استعفے موصول ہوئے ہیں، جن پر دستخط ایک دوسرے سے مختلف اور غیرمشابہ ہیں۔ گورنر ہاؤس سے جاری خط میں کہا گیا ہے کہ دستخطوں میں فرق ہونے کی وجہ سے استعفے کی تصدیق ضروری ہے۔
فیصل کنڈی نے بتایا کہ وہ اس وقت شہر سے باہر ہیں اور 15 اکتوبر کو واپس آئیں گے۔ اس سلسلے میں وزیراعلیٰ علی امین گنڈاپور کو ہدایت کی گئی ہے کہ وہ 15 اکتوبر کو دوپہر 3 بجے گورنر ہاؤس آ کر استعفے کی تصدیق کریں۔
دوسری جانب خیبر پختونخوا اسمبلی میں نئے قائدِ ایوان کا انتخاب آج ہوگا۔ نامزد امیدواروں میں پاکستان تحریک انصاف کے سہیل آفریدی، جمعیت علمائے اسلام (ف) کے مولانا لطف الرحمان، مسلم لیگ ن کے سردار شاہ جہان یوسف اور پیپلز پارٹی کے ارباب زرک خان شامل ہیں۔
