ملاں — اطالوی لگژری اسپورٹس کار ساز ادارے لیمبورگینی نے 2026ء کی پہلی ششماہی کے دوران اپنے آپریٹنگ پرافٹ میں 8 فیصد سے زائد کی کمی کا اعلان کیا ہے، جو امریکی ٹیرف اور مشرق وسطیٰ کے تنازعے کے باعث آٹوموبائل شعبے کو درپیش چیلنجز کی عکاسی کرتا ہے۔ لیمبورگینی کا آپریٹنگ پرافٹ گزشتہ سال کے 431 ملین یورو کے مقابلے میں کم ہو کر 395 ملین یورو (450 ملین ڈالر) پر آ گیا، جبکہ آپریٹنگ مارجن بھی 26.5 فیصد سے گر کر 22.7 فیصد رہ گیا۔ چیف فنانشل افسر پاؤلو پوما کے مطابق، گزشتہ سال نافذ کیے جانے والے امریکی ٹیرف اور کرنسی کے اتار چڑھاؤ نے کارکردگی پر منفی اثر ڈالا۔ تاہم، گاڑیوں کی ترسیلات میں 4.6 فیصد کمی (مجموعی طور پر 5,422 گاڑیاں) کے باوجود، فولکس ویگن کی اس ذیلی کمپنی کا ریونیو 7.4 فیصد اضافے کے ساتھ 1.74 ارب یورو کی تاریخی سطح پر پہنچ گیا۔
کمپنی کے سی ای او اسٹیفن ونکیلمین نے نامہ نگاروں سے گفتگو کرتے ہوئے کہا کہ عالمی مارکیٹوں میں بڑھتی ہوئی بے یقینی کے باوجود لیمبورگینی نے اپنی لچک کا ثبوت دیا ہے اور تاریخ کی بلند ترین آمدنی حاصل کی ہے۔ واضح رہے کہ اس سے قبل پیرنٹ کمپنی فولکس ویگن نے بھی دوسری سہ ماہی کے منافع میں 9.5 فیصد کمی کے بعد 2026ء کے اپنے سیلز گروتھ کے اہداف کو ترک کر دیا تھا، کیونکہ یورپی کار ساز ادارے عالمی تجارتی رکاوٹوں اور معاشی دباؤ کا سامنا کر رہے ہیں۔
