ستمبر 13، 2025
ویب ڈیسک
مدینہ منورہ:
مدینہ منورہ کے رہائشیوں اور زائرین نے جمعرات کی صبح طلوعِ آفتاب سے کچھ دیر قبل ایک زوردار دھماکے کی آواز سنی، جس کے بعد آسمان پر شعلہ یا میزائل نما چیز دکھائی دینے کی ویڈیوز سوشل میڈیا پر تیزی سے وائرل ہوگئیں۔
عینی شاہدین کے مطابق یہ واقعہ صبح تقریباً 5 بجکر 43 منٹ پر پیش آیا۔ لوگ اچانک گڑگڑاہٹ اور دھماکے کی آواز سے گھبرا گئے جبکہ آسمان پر ایک تیز روشنی حرکت کرتی ہوئی نظر آئی۔ سوشل میڈیا پر مختلف ویڈیوز میں اسے ایک میزائل یا شعلہ قرار دیا جارہا ہے۔
ادھر “انسائیڈ دی حرمین” نامی معتبر پلیٹ فارم نے تصدیق کی ہے کہ وہ اس واقعے سے آگاہ ہیں، تاہم شہریوں اور زائرین سے درخواست کی گئی ہے کہ قیاس آرائیوں سے گریز کریں اور سرکاری وضاحت کا انتظار کریں۔
سوشل میڈیا پر بعض صارفین نے دعویٰ کیا کہ یہ کسی بیرونی حملے یا میزائل کی نشانی ہوسکتی ہے، جبکہ کچھ لوگوں کا کہنا تھا کہ یہ ممکنہ طور پر خلائی ملبہ تھا جو زمین کی فضا میں داخل ہو کر جل گیا۔ تاہم اب تک سعودی حکام کی جانب سے اس بارے میں کوئی باضابطہ بیان سامنے نہیں آیا۔
فی الحال یہ واضح نہیں ہوسکا کہ یہ دھماکہ اور شعلہ نما روشنی دراصل کیا تھی، لیکن واقعے نے مدینہ منورہ کے شہریوں اور زائرین کو تشویش میں مبتلا کردیا ہے۔
