امریکی ریاست نیویارک نے بچوں کو مصنوعی ذہانت یعنی اے آئی چیٹ بوٹس کے ممکنہ نقصانات سے بچانے کے لیے نیا قانون منظور کر لیا ہے۔
گورنر کیتھی ہوکل نے 28 اکتوبر کو اس قانون پر دستخط کیے۔ اس قانون کے تحت 18 سال سے کم عمر صارفین کے لیے اے آئی چیٹ بوٹس کے غیر محفوظ فیچرز پر پابندیاں عائد کی گئی ہیں۔
قانون کے مطابق چیٹ بوٹس بچوں کے سامنے خود کو حقیقی انسان ظاہر نہیں کر سکیں گے، نہ ہی انہیں خود کو نقصان پہنچانے کی ترغیب دے سکیں گے یا نامناسب جنسی گفتگو میں شامل ہو سکیں گے۔
کمپنیوں کو کم عمر صارفین کی شناخت کے لیے عمر کی تصدیق کے اقدامات بھی کرنا ہوں گے۔
یہ قانون یکم جنوری 2027 سے نافذ ہونے والا ہے۔ اس اقدام کا مقصد بچوں کو آن لائن محفوظ رکھنا ہے، جبکہ بعض ٹیکنالوجی حلقوں نے قانون کی کچھ پابندیوں کی وضاحت پر سوالات اٹھائے ہیں۔
