لاہور (اسپورٹس ڈیسک): پاکستان ہاکی ٹیم کی بھارت میں ہونے والے ایشیا کپ 2025 میں شرکت غیر یقینی صورتحال کا شکار ہو گئی ہے، کیونکہ بھارتی حکومت کی جانب سے تاحال ویزا کی کوئی واضح پالیسی سامنے نہیں آئی۔
ایشیا کپ 2025 کا انعقاد 27 اگست سے 7 ستمبر تک بھارتی ریاست بہار کے شہر راجگیر میں ہونا ہے، جو کہ 2026 ہاکی ورلڈ کپ کا کوالیفائنگ ایونٹ بھی ہے۔ ہاکی انڈیا کے سیکریٹری جنرل بھولا ناتھ سنگھ نے کہا ہے کہ "پاکستان کی شرکت کا فیصلہ حکومت ہند کی ہدایات کی روشنی میں کیا جائے گا کیونکہ ملک کی سلامتی سب سے پہلے ہے۔”
پاکستان ہاکی فیڈریشن نے ایشین ہاکی فیڈریشن سے ویزا گارنٹی کا مطالبہ کیا ہے تاکہ ٹیم کی بروقت شرکت کو یقینی بنایا جا سکے۔ پی ایچ ایف کے ایک اعلیٰ عہدیدار کا کہنا تھا، "ہم ورلڈ کپ جیسے اہم ایونٹ میں شرکت کا موقع ضائع نہیں کرنا چاہتے، اس لیے یا تو ہمیں ویزا کی مکمل گارنٹی دی جائے یا ایونٹ بھارت سے منتقل کیا جائے۔”
یاد رہے کہ اس سے قبل 2016 کے جونیئر ورلڈ کپ میں بھی پاکستان کی ٹیم کو بھارت کی جانب سے ویزا نہ ملنے کے باعث شرکت سے روکا گیا تھا۔ موجودہ کشیدہ سیاسی حالات، خاص طور پر حالیہ پاہلگام حملے کے بعد، دونوں ممالک کے تعلقات میں مزید تناؤ پیدا ہوا ہے۔
ایشیا کپ میں بھارت، پاکستان، جاپان، کوریا، چین، ملائیشیا، عمان اور چائنیز تائپے کی ٹیمیں حصہ لیں گی۔ ٹورنامنٹ کی فاتح ٹیم 2026 ورلڈ کپ میں براہ راست کوالیفائی کرے گی۔
