نیویارک میں پاکستان سپر لیگ کے دوسرے عالمی روڈ شو کے دوران پی سی بی چیئرمین محسن نقوی نے پی ایس ایل کے گیارہویں ایڈیشن کے شیڈول سے پردہ اٹھا دیا۔ ان کے مطابق پی ایس ایل 11 کا آغاز 26 مارچ 2026 کو ہوگا جبکہ فائنل 3 مئی کو کرانے کی منصوبہ بندی کی جا رہی ہے۔
روڈ شو میں ملکی و غیر ملکی سرمایہ کاروں کے ساتھ ساتھ قومی کرکٹ کے موجودہ اور سابق ستارے بھی شریک تھے جن میں سلمان علی آغا، ابرار احمد، صائم ایوب، سعود شکیل، فہیم اشرف، وسیم اکرم اور رمیز راجہ شامل تھے۔ تقریب کے دوران لیگ کے مستقبل، کمرشل وسعت اور عالمی سطح پر بڑھتی دلچسپی پر بھی تفصیلی بات چیت کی گئی۔
محسن نقوی نے کہا کہ نیویارک میں موجود سرمایہ کاروں کی جانب سے سب سے زیادہ سوال پی ایس ایل کے ٹائم فریم کے حوالے سے کیا گیا، جس کے بعد انہوں نے واضح کیا کہ لیگ کو باقاعدہ منصوبہ بندی کے تحت طویل اور مستحکم ونڈو میں منعقد کیا جا رہا ہے۔ ان کا کہنا تھا کہ پی ایس ایل اب صرف ایک ٹی ٹوئنٹی ٹورنامنٹ نہیں بلکہ ایک عالمی برانڈ بن چکا ہے، جس کی مارکیٹ ویلیو اور بین الاقوامی پہنچ میں مسلسل اضافہ ہو رہا ہے۔
پی سی بی چیئرمین کے مطابق پی ایس ایل 11 کے انعقاد کا مقصد نہ صرف شائقینِ کرکٹ کو معیاری تفریح فراہم کرنا ہے بلکہ عالمی سرمایہ کاروں کو پاکستان کرکٹ کے ساتھ جوڑنا بھی ہے، تاکہ لیگ مزید مضبوط اور مستحکم ہو سکے۔
