بگ بیش لیگ میں محمد رضوان کا ڈیبیو یادگار ثابت نہ ہو سکا۔ جیلونگ میں کھیلے گئے میچ میں میلبورن رینیگیڈز کی جانب سے ڈیبیو کرنے والے پاکستانی وکٹ کیپر بلے باز محمد رضوان صرف 4 رنز بنا کر آؤٹ ہو گئے۔ رضوان نے 10 گیندوں کا سامنا کیا تاہم بڑے اسکور والے میچ میں وہ اپنی موجودگی کا بھرپور اثر نہ چھوڑ سکے۔
میچ میں رینیگیڈز نے 212 رنز کا بڑا مجموعہ اسکور بورڈ پر سجایا، جہاں ٹیم کے دیگر بلے بازوں نے جارحانہ انداز اپنایا، مگر رضوان اس رفتار کے ساتھ خود کو ہم آہنگ نہ کر سکے۔ ان کی وکٹ پیٹرک ڈولی نے حاصل کی، جو برسبین ہیٹ کے لیے اہم بریک تھرو ثابت ہوئی۔
اگرچہ محمد رضوان کا یہ بگ بیش میں پہلا میچ تھا، لیکن شائقین کو ان سے بہتر آغاز کی امید تھی۔ اب نظریں آنے والے مقابلوں پر ہوں گی کہ آیا رضوان اپنے تجربے اور کلاس کا مظاہرہ کرتے ہوئے مضبوط کم بیک کر پاتے ہیں یا نہیں۔
