8ستمبر،2025
نیشنل ڈیزاسٹر مینجمنٹ اتھارٹی (این ڈی ایم اے) نے آئندہ 12 سے 24 گھنٹوں کے دوران ملک کے مختلف حصوں میں بارشوں کی پیشگوئی کرتے ہوئے الرٹ جاری کر دیا ہے۔ رپورٹ کے مطابق سندھ، پنجاب اور بلوچستان کے کئی اضلاع میں بارش کا امکان ہے۔
این ڈی ایم اے نے خبردار کیا ہے کہ نشیبی علاقوں میں اربن فلڈنگ، ندی نالوں میں طغیانی اور پہاڑی علاقوں میں لینڈ سلائیڈنگ کا خدشہ ہے۔ عوام کو ہدایت کی گئی ہے کہ غیر ضروری سفر سے گریز کریں اور ممکنہ خطرناک صورتحال سے بچنے کے لیے حفاظتی تدابیر اختیار کریں۔
دوسری جانب کراچی میں بھی وقفے وقفے سے بارش کا سلسلہ جاری ہے۔ شارع فیصل، ملیر، گلستانِ جوہر اور آئی آئی چندریگر روڈ سمیت مختلف علاقوں میں ہلکی اور درمیانی شدت کی بارش ریکارڈ کی گئی ہے۔
میئر کراچی مرتضیٰ وہاب نے شہریوں پر زور دیا ہے کہ وہ بارش کے دوران احتیاط کریں اور سفر کرنے سے پہلے سڑکوں کی صورتحال ضرور دیکھیں۔ انہوں نے مزید کہا کہ کسی بھی ہنگامی صورتحال میں شہری 1915 پر کال کرکے مدد حاصل کر سکتے ہیں۔
