2 جولائی 2025
محکمہ موسمیات کے سندھ ارلی وارننگ سینٹر نے مون سون کی آمد کے پیش نظر صوبے میں الرٹ جاری کر دیا ہے، کیونکہ جنوب مشرقی علاقوں میں معتدل مون سون ہواؤں کا داخلہ شروع ہو چکا ہے۔
محکمہ موسمیات کی تازہ ترین پیشگوئی کے مطابق کراچی میں آئندہ تین روز کے دوران مطلع زیادہ تر ابر آلود اور موسم مرطوب رہنے کا امکان ہے، جبکہ رات اور صبح کے اوقات میں ہلکی بارش یا بوندا باندی ہو سکتی ہے۔
تھرپارکر، عمرکوٹ، میرپورخاص اور سانگھڑ سمیت دیگر جنوبی اضلاع میں آج سے 4 جولائی تک کہیں کہیں ہلکی معتدل بارش اور گرج چمک کے ساتھ بارش کا امکان ظاہر کیا گیا ہے۔
اسی طرح بدین، ٹھٹھہ، سجاول، جامشورو، حیدرآباد، ٹنڈو محمد خان، دادو، خیرپور، سکھر اور لاڑکانہ سمیت دیگر اضلاع میں بھی ہلکی بارش یا بوندا باندی متوقع ہے۔
حکام نے خاص طور پر نشیبی علاقوں میں رہنے والے افراد کو احتیاطی تدابیر اختیار کرنے کا کہا ہے تاکہ کسی بھی ممکنہ پریشانی سےبچا جا سکے۔
